Një 25-vjeçar u ekzekutua pak pas mesnate në Tiranë nga një efektiv policie, pasi nuk i ishte bindur urdhrit të ndaluar dhe më pas ka kërcënuar policin.
Për këtë ngjarje janë ngritur shumë pikëpyetje, pasi familjarët kanë deklaruar me bindje se i riu nuk ka qenë i armatosur dhe pse u bë me dije se në vendin e ngjarjes u gjend një pistoletë që dyshohet se i përkiste viktimës.
Po ashtu, pikëpyetje janë ngritur dhe për të drejtën e përdorimit të armës nga ana e efektivit të policisë dhe nëse ai ka ndjekur të gjitha procedurat ligjore paralajmëruese para se ta qëllonte për vdekje.
Por çfarë thotë ligji për armet për rastet kur punonjësit e policisë duhet të qëllojnë me armë zjarri
“Përpara përdorimit të armëve të zjarrit punonjësit e policisë dhe subjektet e tjera duhet të identifikojnë veten si të tillë si dhe t’i japin një paralajmërim të qartë duke shprehur me zë të lartë “Ndal”, ndjekur dhe paralajmërimi i dytë “Ndal se do të qëlloj”, nëse ai nuk ndalet.
Në rrethana objektivisht të pamundura, të ngutshme, mund të mos bëhet paralajmërimi në rast se një veprim i tillë rrezikon subjektet e këtij ligji ose personat e tjerë nga një rrezik i çastit për jetën. Në këtë rast qëllohet pa paralajmërim, duke synuar pjesët e poshtme të trupit”./ Opinion.al
