Detaje të reja janë zbardhur nga ngjarja e ndodhur në Greqi, ku mbeti i vrarë aksidentalisht një i ri shqiptar. Sipas medias greke protothema.gr, shtatë shqiptarët që u përleshën në kafenenë në Athinë ishin pjesë e bandave të trafikut të drogës. Njëri prej tyre qëlloi me armë zjarri gjatë konfliktit, duke lënë të vdekur aksidentalisht një tjetër shqiptar i cili po shikonte ndeshjen në lokal.
Policët e sektorit të vrasjeve në Athinë, që po trajtojnë rastin, përveç xhipit të gjetur në afërsi të kafenesë së rrugës Kastamonis dhe që dyshohet se i përkiste njërit prej shtatë shqiptarëve, kanë gjetur edhe një veturë Mercedes.
Mjeti është përmendur në deklaratat e banorit të zonës i cili ka përshkruar atë që ka parë në minutat e para pas ngjarjes së përgjakshme të së martës mbrëma.
Megjithatë, për momentin, shtatë shqiptarët nuk janë identifikuar, po ashtu edhe identiteti i viktimës, i cili mësohet se është i moshës rreth 30-35 vjeç.
Episodi i përgjakshëm ka ndodhur në orën 23:40 të së martës mbrëma në një kafe me nargjile në rrugën Kastamonis, në Nea Joni. I riu mbeti fillimisht i plagosur dhe u transportua në spital, por nuk arriti t’iu mbijetojë plagëve të marra.
