Familjarët e 45-vjeçarit Adriatik Tresa, i cili mbeti i vrarë të premten në Ekuador, u kanë kërkuar mbrojtje autoriteteve në Ekuador, ndërsa akuzojnë se deri më tani nuk po bëhet asgjë për të gjetur autorët e vrasjes së shqiptarit.
Mediat ekuatoriane shkruajnë se familjarët po shikojnë mundësinë e riatdhesimit të trupit të Adriatik Tresës dhe varrosjen e tij në Shqipëri.
Adriatik Tresa u ekzekutua me gjashtë plumba brenda shtëpisë së tij nga persona të maskuar si policë. Imazhet e kamerave të sigurisë të kompleksit, tregojnë se si vrasësit e maskuar dhe të armatosur, nënshtrojnë rojet private duke hapur dyert dhe duke hyrë brenda ndërtesës.
Autoritetet në Guayaquil theksuan se shkak i ekzekutimit mafioz është trafiku i kokainës nga Amerika Latine drejt Europës. Sipas policisë vendase, Adriatik Tresa po hetohej si pjesë e një karteli mjaft të rrezikshëm që trafikonte drogë dhe shkak i vrasjes dyshojnë prishjen e pazareve.
Prokurori i çështjes Walter Jaramillo, tha se nga tetë personat që janë hetuar vetëm një ndodhet në paraburgim.
“Familjarët e të ndjerit janë përgjegjës për fshehjen e provave në vendin të ngjarjes, pasi ata morën dokumente, një çantë, një makinë dhe telefonin celular të viktimës” deklaroi ai.
Tresa u qëllua për vdekje më 20 nëntor në orën 3 të mëngjesit në vilën e tij në qytetin e Guayakilit në Ekuador. 6 persona kanë dalë nga makinat dhe duke u prezantuar si policë me urdhër kontrolli në dorë kanë mundur të kalojnë rojet e sigurisë dhe të hyjnë brenda në vilë duke ekzekutuar shqiptarin./Opinion.al
