Më 27 gusht Tirana u trondit nga tjetër krim të tipit mafioz ku mbeti i vdekur Santjago Malko. Deri më tani policia ende nuk ka një person të arrestuar në lidhje me ngjarjen.
Por, publikimi i të dhënave të Santjago Malkos pas ekzekutimit ka ngjallur “furtunë” në Policinë e Shtetit. Mësohet se Drejtoria e Standardeve ka nisur verifikimin për më shumë se 100 punonjës policie që janë identifikuar përmes përdorimit të një passwordi të veçantë pasi kanë kërkuar të dhëna në sistemin TIMS për ish-policin.
Verifikimi i tyre ka nisur pasi publikimi i të dhënave nga punonjës të tjerë të policisë, përbën shkelje të ligjit. Duke iu referuar ligjit, të dhënat për një person të caktuar mund t’i nxjerrë të dhënat nga sistemi TIMS vetëm nëse ai është i ngarkuar drejtpërdrejtë në hetimin e një çështjeje.
Dyshimet janë se fotoja e nxjerrë nga sistemi TIMS është bërë publike edhe për mediat. Gjithashtu janë publikuar edhe të dhëna sensitive që kanë cënuar figurën e viktimës.
Kujtojmë se 26-vjeçari u ekzekutua nga persona ende të paidentifikuar në rrugën “Xhanfize Keko”, teksa po udhëtonte makinën e tij BMW X5.
Dyshohet se atentatorët janë vrasës me pagesë. Ndërkohë, hetuesit duke marrë parasysh të shkuarën e viktimës po hetojnë në disa pista, ku përfshihen hakmarrja apo prishja e pazareve të drogës./ Opinion.al E.Xh.
