Gjykata e Posaçme ka marrë sot vendimin për Ilir Selmanin e Elvis Gacaj.
Mësohet se GJKKO vendosi dënimin me 28 vite burg për Ilir Selmanin dhe 7 vite burg për Elvis Gacaj.
Kujtojmë se Ilir Selmani dhe Elvis Gaçaj, akuzohen si bashkëpunëtorë në vrasjen e ish-policit Santiago Malko, krahu i djathtë i Ervis Martinajt.
Elvis Gacaj u arrestua në tetor të 2019-s nga Policia e Durrësit. Emri i tij nuk është i panjohur për autoritetet. Ai ishte një prej tetë personave të shpallur në kërkim për këtë vrasje dhe dyshohet se ka qenë tepër aktiv në vrasjen e ish-efektivit të Policisë Malko. Në burg për këtë vrasje vazhdon të mbetet Belndi Teta, për të cilin Prokuroria ka kërkuar ndryshimin e akuzës nga “pengim i zbardhjes së të vërtetës” në “përfshirje në vrasje”.
Ndërkohë, Ilir Selmani u arrestua në prill të vitit 2020, i dyshuar si bashkëpunëtor në vrasjen e Santiago Malkos. I dyshuar dhe si i përfshirë në klanin “Duka”, Selmani ra në prangat e policisë në afërsi të maternitetit “Koço Glizoheni”.
Ai dyshohet si bashkëpunëtor në vrasjen e Malkos, pasi u kap nga disa kamera sigurie teksa mblidhte mbeturina dhe i hidhte në një kosh pranë vendngjarjes.
Ish-punonjësi i policisë, Santiago Malko, mik i Ervis Martinajt, u vra në makinën e tij mbrëmjen e 27 gushtit të vitit 2019 pranë zonës së “Porcelanit” në Tiranë./Opinion.al
