Ish-deputeti i Partisë Demokratike, Enkelejd Alibeaj akuzon Policinë e Shtetit për vrasjen e 25-vjeçarit Klodian Rasha.
Në fjalën e tij ai shprehet se, forcat e policisë po tentojnë të manipulojnë provat e ngjarjes duke fshehur kështu të vërtetën e ekzekutimit, i cili ndodhi në orët e para të mëngjesit. Alibeaj akuzon Ramën që ka ndërtuar një polici e cila nuk lufton bandat dhe krimin por vret dhe gjobit qytetarët.
Sipas tij, asnjë skenar nuk mund të manipuloj provat e kësaj ngjarje, ndërkohë që Prokuroria duhet të kishte marrë masa për për të ndaluar manipulimin e ekzekutimit.
Klodian Rasha është viktima që u ekzekutua nga një efektiv i forcave “Shqiponja”. Ngjarja ndodhi në orët e para të mëngjesit të sotëm në rrugën “Dritan Hoxha” në Tiranë. Sipas të dhënave, efektivi e ka qëlluar me dy plumba të riun, pasi sipas tij, ai nuk i është bindur urdhërit për të ndaluar dhe më pas e ka kërcënuar. Ndërkaq në pranga ka rënë efektivi që ka kryer vrasjen.
Deklaratë e Enkelejd Alibeaj;
30 vjet më parë, si në këtë natë, të rinjtë u ngritën kundër një regjimi që i mbante të izoluar dhe të nënshtruar përmes represionit, dhunës, torturave, frikës, përmdjekjes, burgimit dhe vrasjeve pa gjyq. 30 vjet më pas, me Edi Ramën në krye të qeverisë, asgjë nuk ka ndryshuar në mentalitetin e regjimit policor të drejtimit të shtetit.
Në Ditën e Rinisë, një 25 vjeçar u ekzekutua me plumb në kokë nga regjimi, sepse nuk respektoi orën policore të karantinës. Një i ri që vrapon për t’i shpëtuar gjobës apo sjelljes brutale, që e kemi parë të gjithë në rastin e 15 vjeçarit gjatë karantinës së parë, nuk përbën asnjë rrezik për policinë.
Ajo që e bën edhe më të rëndë situatën, janë njoftimet zyrtare të Policisë së Shtetit, të cilat krijojnë bindjen e tentativës për manipulimin dhe fshehjen e së vërtetës, me justifikime të denja për një bandë. Asnjë skenar i sigurimit të shtetit nuk mund të justifikojë ekzekutimin e të riut.
Prokuroria duhet të kishte marrë menjëherë masat për ndalimin e manipulimit të ngjarjes, zbardhjen e të vërtetës sa me shpejt dhe informimin e publikut për ketë ngjarje që ka shokuar të gjithë shoqëinë. Për këtë akt kriminal të pashembullt duhet drejtësi pa vonesë! Arrestimet sa për sy e faqe, për të mashtruar publikun e revoltuar, shërbejnë vetëm që regjimi i Edi Ramës të blejë kohë. Policia që vret një të ri në Ditën e Rinisë është modeli më i keq i Policisë së Shtetit. Sot vrasësi i të riut nuk është efektivi i policisë, por Edi Rama dhe Sandër Lleshaj, me politikën e tyre qeveritare të armiqësimit të Policisë me qytetarët dhe bashkëpunimit të Policisë me bandat.
Është irrituese që, në 8 vite, Edi Rama ndërtoi modelin e Policisë që nuk lufton krimin, por burgos, gjobit dhe vret qytetarët e pambrojtur. Kjo është arsyeja përse Sandër Lleshaj vazhdon të jetë akoma Ministër i Brendshëm dhe nuk është shkarkuar nga Edi Rama! Është e paprecedentë që në 8 vite, në vend të komunikatave të përditshme sesa grupe kriminale ka zbuluar dhe arrestuar, Policia e Shtetit flet vetëm për sa gjoba u ka vendosur qytetarëve. Kjo nuk është arsye se përse ekziston Policia e Shtetit. Kjo është një politikë e gabuar, që e armiqëson Policinë me qytetarët. Prandaj, edhe Edi Rama e mbron Sandër Lleshajn, duke mos e shkarkuar!
Ky është modeli i shtetit policor, i ndërtuar nga Edi Rama. Ky është bërë një model i padurueshëm për qytetarët, që po thonë “mjaft më!
Duhet ndryshim”! Qytetarët meritojnë një qeveri që i trajton me respekt dhe dinjitet shtetasit e vet./ Opinion.al
