Edmond Përdoda, 39-vjeçari i arrestuar nga Policia e Lezhës këtë të premte, ishte shpallur në kërkim për vrasjen e dy personave, ngjarje e ndodhur në vitin 2020, në fshatin Lalm i Ri.
Bëhet fjalë për vrasjen e rapsodit të njohur Kol Murrani dhe shokut të tij, Preng Simoni.
Ngjarja e rëndë ndodhi 27 prill të vitit 2020 në fshatin Lalm i Ri në Lezhë. Pas krimit, në pranga ra Aleksandër Perdoda ndërsa sot u arrestua Edmond Përdoda. Të dy vëllezërit rezultojnë me precedentë kriminale në fushën e krimeve ndaj jetës.
Kujtojmë se vrasja e dy viteve më parë ndodhi për motive pronësie. Dy vëllezërit pretendonin se toka ku ndodhej rapsodi me shokun e tij iu përkiste atyre.
Pas vrasjes dy vëllezërit lanë trupat e viktimave në pyll. Viktimat u gjetën nga djali i Preng Simonit, që kishte dalë të kërkonte babanë me të cilin kishte humbur çdo kontakt prej orësh të tëra.
39-vjeçari i arrestuar sot nga policia, banues në Lalm, rezulton i dënuar më parë në shtetin grek, për veprën penale “Vrasja”, dhe në Shqipëri, për armëmbajtje pa leje dhe shkatërrim prone./Opinion.al
