Misioni i NATO-s në Kosovë, KFOR-i, ka dënuar ashpër sulmin ndaj Policisë së Kosovës në veri të vendit, ku mbeti i vrarë një polic.
Në një reagim zyrtar, KFOR thotë se Policia e Kosovës ka përgjegjësinë e para për të reaguar në terren.
Më tej në reagim thuhet se trupat e KFOR ndodhen në zonë dhe janë të gatshme të përgjigjen nëse u kërkohet.
“Misioni i KFOR i udhëhequr nga NATO dënon ashpër sulmin kundër Policisë së Kosovës dhe shpreh ngushëllimet më të thella për familjen dhe të dashurit e të ndjerit.
Komandanti i KFOR qëndron në kontakt të afërt dhe të vazhdueshëm me të gjitha palët e interesuara, përfshirë edhe BE-në, shefin e Forcave të Armatosura Serbe, me institucionet në Kosovë dhe po punon për të gjetur një zgjidhje.
Policia e Kosovës, ka përgjegjësinë e para që të menaxhojë incidentet në terren.
KFOR po e monitoron nga afër situatën në Banjska, trupat e KFOR janë në zonë dhe të gatshme të përgjigjen nëse u kërkohet”, thuhet në reagimin e KFOR.
Disa minuta më parë Policia e Kosovës vrau një pjestar të grupit të armatosur që po qëndron në manastirin e Banjskës.
