Tre nga gjashtë personat të kërkuar për vrasjen e Ardian Nikulajt janë arrestuar nga policia në Britaninë e Madhe.
Mes të arrestuarve është edhe porositësi i vrasjes, Edmond Haxhia. Po ashtu policia bën me dije se janë vënë në pranga edhe Thomas Mithan dhe Steven Hunt. Të tre janë arrestuar në Londër nga një operacion i kryer nga Agjencia Kombëtare për Krimin (NCA). Pritet që të arrestuarit të ekstradohen në Tiranë sepse mes dy vendeve ka një marrëveshje ekstradimi.
“Falë bashkëpunimit të ngushtë mes Policisë shqiptare dhe asaj britanike, pas shkëmbimit të informacionit, lokalizohen dhe kapen në Londër, 3 prej autorëve të dyshuar të vrasjes së biznesmenit Ardian Nikulaj. Në vijim të veprimeve të thelluara hetimore dhe kërkimore, për lokalizimin dhe kapjen e personave të shpallur në kërkim për vrasjen e 51-vjeçarit Ardian Nikulaj, falë shkëmbimit të informacionit në kohë, Policia britanike mundi të lokalizojë në Londër, të kapë dhe të vërë në pranga, me qëllim ekstradimin drejt Shqipërisë, 3 prej shtetasve të shpallur në kërkim, konkretisht shtetasit E. H., Th. M. dhe S. H. Ndërkohë, Policia e Shtetit vijon intensivisht punën, në bashkëpunim të ngushtë me partnerët për lokalizimin dhe kapjen e personave të tjerë të shpallur në kërkim në lidhje me ngjarjen”-njofton policia.
Në lidhje me këtë ngjarje vijojnë të jenë në kërkim tre persona të tjerë. Bëhet fjalë për portugezin Ruben Saravia, i cili dyshohet se është ekzekutori i Nikulajt dhe britanikët Harriet Bridgeman e Harry Simpson.
Britanikët dyshohen se në vrasjen e Nikulajt kanë pasur rolin e vëzhguesve të lëvizjeve të viktimës./Opinion.al
