Autori i vrasjes së dyfishtë në zonën e Astirit, ka pranuar krimin përpara gjykatës, ku janë zbardhur edhe detaje të tjera nga vrasja.
Ai ka rrëfyer se fillimisht kishte qenë i lidhur me Kristina Bardhin, ndërsa më pas krijoi një raport initim me motrën e saj Zhaneta. Lidhje për të cilat ishte në dijeni edhe bashkëshortja e tij legale.
Ademi ka treguar se ka nisur një raport jashtëmartesor me Kristina Bardhin prej më shumë se 20 vitesh. Më pas ai është lidhur me motrën tjetër më të vogël, Zhaneta Metani.
Ademi ka pohuar se me Zhanetën ka edhe 1 fëmijë, të cilin nuk e kanë regjistruar në gjendjen civile, ndërsa me dy motrat dhe bashkëshorten e tij kishin bërë udhëtime në Greqi dhe Pogradec. Sikurse mësohet shkak i vrasjes është bërë xhelozia dhe dyshimet se Zhaneta po krijonte një lidhje tjetër.
Për këtë arsye, Përparim Ademi është afruar në banesën e saj paraditen e 31 Dhjetorit. Para se të ngjitej në apartament, ai ka marrë njërin nga fëmijët që po luante poshtë pallatit, përmes të cilit ka mundur të hyjë në banesë.
Dy motrat, Kristina Bardhi dhe Zhaneta Metani kanë qenë duke ngrënë. Në momentin që është hapur dera dhe motrat kanë parë Përparim Ademin, kanë tentuar të mbyllin derën. 59-vjeçari ka qëlluar me armë fillimisht në derë dhe më pas në drejtim të motrave. Në vendin e ngjarjes janë gjetur 26 gëzhoja plumbash, ndërsa vetëm 5 prej tyre kanë qëlluar motrat Bardhi e Metani.
Pasi ka kryer krimin, 59-vjeçari ka qëlluar nëpër muret e banesës dhe më pas ka lënë armën tip automatik kinez dhe është larguar nga vendi i ngjarjes. Automatiku është gjetur me karikatorin bosh, të cilin autori e ka zbrazur të gjithin. Përparim Ademi akuzohet për veprën penale “vrasje për shkak të marrëdhënieve familjare” dhe rrezikon dënimin nga 20 vite deri në burgim të përjetshëm./Opinion.al
