Autori i dyshuar i vrasjes së 14-vjeçarit Martin Cani dhe plagosjes se Luis Meçjas ka ankimuar në gjykatën e Apelit të Juridiksionit të Përgjithshëm masën e sigurisë “arrest me burg” që është vendosur ndaj tij.
Sipas gazetares Klodiana Lala, përmes avokatit të tij, 14-vjeçari i dyshuar për ngjarjen e rëndë të ndodhur pak metra nga rrethimi i shkollës “Fan Noli” në Tiranë, i është drejtuar me ankim gjykatës së Apelit të Juridiksionit të Përgjithshëm.
Ai kërkon zbutjen e masës së sigurisë “arrest me burg” duke renditur argumentuat e tij, të cilat nuk janë bërë të ditura nga avokati deri në këto momente.
Në kuadër të hetimit, i mituri M.P, është marrë në pyetje nga prokurorja e çështjes në një seancë maratonë që ka zgjatur afro 8 orë. Detajet e dëshmisë që 14-vjecari ka dhënë në ambientet e prokurorisë së Tiranës mbahet në sekret të plotë.
Ndërsa mësohet se autori i dyshuar i krimit është ballafaquar me disa nga të miturit të cilët kanë qenë të pranishëm në ngjarje.
Prokuroria po vijon hetimet për të hedhur dritë mbi mekanizmin e vrasjes së Martin Canit dhe plagosjen e mikut të tij, Luisit. Në vazhdën e këtyre hetimeve është bërë edhe ballafaqimi mes të plagosurit Luis Meçja dhe kushëririt të tij të parë që ka qenë i pranishëm.
Kjo për faktin që Mecja pretendon për një autor të dytë të dyshuar, ndërsa kushëriri i tij ka dhënë versionin e tij për ngjarjen, mos identifikuar asnjë të mitur tjetër që të ketë patur thikë në vendngjarje.
