Presidenti amerikan, Donald Trump ka urdhëruar një sulm ajror në aeroportin e Bagdadit, nga ku mbeti i vrarë Gjenerali i Gardës Revolucionare të Iranit, Qassem Soleimani.
Në këtë sulm ajror u vra edhe Abu Mahdi al-Muhandis, shefi i policisë së Iranit, që njihen ndryshe edhe si Forcat e Mobilizimit Popullor, të cilat u konsideruan përgjegjëse për sulmin e fundit ndaj Ambasadës Amerikane në Bagdad.
Sulmi u krye në orët e para të ditës së premte dhe shënjestra ishin dy makina me të cilat po udhëtonin Soleimani dhe eskorta e tij, të cilët po e merrnin nga aeroporti.
Soleimani sapo kishte mbërritur në Bagdad pas një fluturimi nga Siria, kur katër predha me precizion të lartë goditën dy makinat që kishin brenda Soleimanin dhe eskortën e tij.
“BBC” shkruan se trupi i Soleimanit u bë copash nga sulmi dhe është identifikuar vetëm nga unaza që mbante, ndërkohë që trupi i Al-Muhandisit nuk është gjetur ende.
Pentagoni sqaroi me anë të një komunikate se “ushtria amerikane ka ndërmarrë veprime për të mbrojtur personelin amerikan jashtë shtetit, duke vrarë Qassem Soleimanin”, ndërsa pak pas sulmit ajror, Presidenti Trump postoi në Twitter një foto të flamurit amerikan, pa dhënë shpjegime.
Nga ana tjetër, Ambasada amerikane në Bagdad u ka kërkuar të gjithë shtetasve të saj që të largohen menjëherë nga Iraku pas sulmeve ajrore.
“Për shkak të tensioneve të larta në Irak dhe rajon, ambasada amerikane u bën thirrje shtetasve amerikanë që të largohen menjëherë nga Iraku. Shtetasit amerikanë duket të largohen me linja ajrore apo rrugëve tokësore përmes shteteve tjera”, thuhet në deklaratë.
Irani e ka quajtur sulmin ajror një akt “terrorizmi ndërkombëtar” dhe lideri suprem i vendit, Ajatollahu Ali Khamenei, shpalli tri ditë zie kombëtare dhe u betua se “do të hakmerret ashpër ndaj kriminelëve që vranë Soleimanin”.
Të njëjtin qëndrim ka mbajtur dhe presidenti i vendit i cili tha se do të hakmerren ndaj Shteteve të Bashkuara të Amerikës.
“Nuk ka dyshim se kombi i madh i Iranit dhe kombet e tjera të lira të rajonit do të hakmerren për këtë krim makabër nga Amerika kriminele”, tha Rouhani, duke iu referuar aleatëve të Iranit në Lindjen e Mesme.
