Ditën e sotme ministrja e Drejtësisë Etilda Gjonaj ka folur në lidhje me vrasjen e 25-vjeçarit Klodian Rasha nga një efektiv policie si dhe për protestat që vijojnë prej tre ditësh.
Gjonaj i shprehu ngushëllimet familjes së viktimë gjatë një interviste në “News 24”, ndërsa theksoi se ngjarja ka ndodhur nga veprime të veçuara dhe personale të një efektivi.
Ministrja e ka krahasuar vrasjen e të riut nga efektivi me ngjarjet e 21 janarit dhe Gërdecit, ndërsa theksoi se kjo çështje duhet t’i lihet drejtësisë.
Teksa foli për dhunën në protestë, Gjonaj tha se protestat me të tilla akte nuk i shërbejnë demokracisë.
“Jemi në një situatë paprecedentë. Jeta e humbur e një të riu është një ngjarje shumë e rëndë aq më tepër kur ka ardhur si pasojë e veprimeve të një efektivi të policisë. Dua të shpreh keqardhjen dhe solidarizohem me dhimbjen e madhe të familjes, por nga ana tjetër është një ngjarje e veçuar. Efektivi i policisë ka kryer një veprim personal. Ndodhet në masën e arrestit me burg dhe duhet tua lëmë organeve të drejtësisë të hetojnë. Dua të theksoj se është një ngjarje tërësisht sporadike, tërësisht e veçuar dhe në asnjë rast nuk ka ndodhur me një urdhër politik, ndryshe nga ajo që ka ndodhur disa vite më parë në bulevard kur urdhrat politikë jepeshin nga partia në pushtet apo PD, apo dhjetëra jetë të humbura në rastin e Gërdecit. Policia e Shtetit sot nuk ka asnjë krahasim me policinë në kohën e PD. Sot sjellja e efektivëve të policisë ka një ndryshim thelbësor me sjelljen e efektivëve në kohën e PD-së. Ata sjellin rezultate në përballjen e Shqipërisë me krimin. Shqipëria ka dalë nga harta e kultivimit të drogës. Faktet janë kokëforta dhe nuk meritojnë krahasim me policinë në kohën e PD-së. Ka shumë aspekte që duhen përmirësuar por krahasimi është i pavend. Nëse do e shohim si rast sporadik, duhet të kuptojmë që nuk përfaqëson frymën e Policisë Shqiptare. Të gjithë djemtë e vajzat meritojnë një respekt për punën e tyre në përballje me krimin, por dhe në situata të pazakonta siç ka qenë tërmeti apo dhe në kohën e pandemisë. Përtej fakti që Ministri i Brendshëm nuk ka përgjegjësi ligjore, dhe nuk ka një urdhër politik por pavarësisht se nuk kishte përgjegjësi ligjore ndjeu përgjegjësi morale për të dhënë dorëheqjen. Ndryshe nga ministri i Brendshëm i PD që u bë kryetar bashkie dhe kryetar i partisë. Kjo jep ndryshimin mes neve dhe atyre. Nëse ka një forcë politike që i ka mirëpritur protestat ka qenë PS. Kanë ndodhur shumë protesta, që nga ajo e armëve kimike, ajo e studentëve. Dhanë argumentet e tyre dhe qeveria reflektoi. Protestat janë të ligjshme por kur nuk janë të dhunshme. Me shumë të drejtë kjo jo vetëm revolton qytetarët kur kthehen të dhunshme kur shkatërrojnë e sjellin dëme në pronën publike. Në 30 vjet pluralizëm nuk ka ndodhur që të goditen selitë e një force politike. Për herë të parë po ndodh. Nuk mund të justifikojë irritimi dhunën. Ky shqetësim u përcoll dhe nga komuniteti ndërkombëtar. Me shumë respekt përcollën lidhur me faktin që dënonin protestat e dhunshme”,-tha Gjonaj./ Opinion.al
