Presidenti i SHBA-ve, Donald Trump ka deklaruar se do të lejojë publikimin e dokumenteve sekret në lidhje me vrasjen e bujshme të presidentit John F. Kennedy 54 vite më parë. Një burim zyrtar i Shtëpisë së Bardhë, u shpreh se këto dokumente mund të bëhen publike ditën e enjte.
Çfarë janë dokumentet sekret të vrasjes së JFK?
Janë më shumë se 5 milion faqe dhe regjistrime të cilat kanë lidhje me vrasjen e presidentit më 2 nëntor të vitit 1963 në Dallas. Në këto dokumente përfshihen regjistrime, filmime, fotografi të cilat ndodhen në arkivat e shtetit. Më shumë se 88% të këtyre dokumenteve janë bërë publike që pas vitit 1990, dhe 11% e tyre janë publikuar të censuruara.
Vetëm 1% e këtyre dokumenteve ka mbetur plotësisht sekret, dhe pritet të bëhen publike me miratimin e presidentit Trump. Sipas profesorit të Universitetit të Virginias Larry Sabato publikimi i tyre do i hapë rrugë zbardhjes së shumë pikëpyetjeve në lidhje me këtë ngjarje. Ai shprehet se shumë prej studentëve të tij janë në pritje të publikimit të këtyre dokumenteve. E vetmja pengesë këto vite për publikimin e tyre ka qenë CIA dhe FBI, të cilat nuk e kanë parë të arsyeshëm bërjen publike të këtyre detajeve.
