Ashtu siç edhe pritej Ferdinand Rukaj u la në masën e sigurisë “burg pa afat”. Seanca u zhvillua sot në Gjykaten e Krimeve të Rënda. Veprimi i tij tronditi mbarë opinionin publik, pasi pasditen e së shtunës, hodhi gruan nga dritarja e katit të katërt të banesës ku jetonin në Fier. 52 vjeçari është shfaqur i heshtur në gjykatë. Ai ka folur asnjë fjalë gjatë seancës për masën e sigurisë, por avokati i tij mbrojtës ka patur një kërkesë. Mësohet se ai ka kërkuar ekspertim psikiatrik për Rukon. Gjykata nuk është shprehur në lidhje me kërkesën e mbrojtësit ligjor pasi një ekspertizë e tillë pritet të bëhet gjatë hetimit nga organi i akuzës.
Fundjavën e kaluar, Ferdinand Rukaj, pas një debati me gruan e tij, Liljanën e ka marrë forcërisht dhe e ka hedhur të zhveshur nga dritarja e banjos në një pallat në lagjen “Kryengritja e Fierit”. Krimi i rëndë ndodhi nderkohe qe dy fëmijët e mitur të çiftit ishin në shtëpi. Daja i tyre ka kërkuar kujdestarinë e fëmijëve të Liljanës.
Tragjedia është e dyfishtë në rastin e Liljanës, pasi ajo kishte kërkuar mbrojtje nga gjykata e policia përpara një muaji, por kjo mbrojtje nuk iu dha kurrë. Siç u mësua pas ngjarjes, gjyqtari kishte dhënë urdhër mbrojtje për të, por vendimi nuk u kishte shkuar institucioneve të tjera, siç është policia.
