Sot mbi trupin e 43-vjeçarit shqiptar, Fatmir Ara, i gjetur i pajetë të shtunën në një pyll të San Carlo Canavese në Itali, do të kryhet autopsia. Nga përgjigjet e dala prej autopsisë pritet të hidhet dritë mbi vrasjen e tij.
Ndërkohë, karabinierët e Compagnia di Venaria po marrin në pyetje disa persona, familjarë por edhe ata që e njihnin mirë viktimën për të rindërtuar orët e fundit para vdekjes. Po ashtu, ata po kontrollojnë telefonatat e fundit që Ara ka kryer me celularin e tij.
Fatmir Ara ishte zhdukur që nga e premtja. Pronar i firmës “Nuova Edile”, nuk ishte kthyer në shtëpinë e tij në Mathi, ku jetonte me partneren dhe dy fëmijët.Fatmir Ara ishte në arrest shtëpie dhe mund të dilte vetëm për punë.
Sakaq, hetimet janë fokusuar në të shkuarën e tij, pasi viktima ishte një person me precedent të ndryshëm penalë. Autoritetet italiane nuk përjashtojnë asnjë pistë, veçanërisht atë të prishjes së pazareve të drogës dhe të larjeve të hesapeve.
Mediat italiane shkruajnë se, Fatmir Ara, përpara kompanisë së ndërtimit, drejtonte një piceri në Ciriè, pranë stacionit hekurudhor Torino-Ceres. Pikërisht ai vend u konsiderua si baza logjistike për furnizimin e tregut të drogës në qytet në një hetim të vitit 2020. Ai u arrestua me pesë bashkatdhetarë të tjerë, për veprën penale të “shpërndarjes së drogës” që varionin nga tetori 2017 deri në gusht 2019.
Pikërisht në atë periudhë, sipas hetuesve, banda, e cila e bleu drogën në Torino, në Lungo Dora Napoli ose në Mirafiori Nord, ia shiti Ciriès. Klientët porosisnin me kodin “pica dhe birrë” dhe droga iu shkonte në shtëpi. “Miri”, siç quhej Fatmir Ara, kishte “një rol më vete” për hetuesit dhe lexohet ndër gazeta “me rëndësi të padyshimtë dhe të padiskutueshme”.
Në të kaluarën e tij ai ishte dënuar për “armëmbajtje pa leje”,ndërsa ishte dënuar për një histori që përfshinte një pjesëtar të forcave të policisë, të cilit Fatmiri i kishte kërkuar të kontrollonte bazën e të dhënave për ndonjë ankesë kundër tij. Karabinierët, të koordinuar në hetimet nga kryeprokurorja e Ivrea Gabriella Viglione, po hetojnë çdo detaj për të mos i lënë asgjë rastësisë.
Ditën e djeshme ata janë kthyer në vendin e krimit, në fushën ku është gjetur kufoma. Sot, do të bëhet autopsia nga mjeku ligjor Roberto Testi. Nga ekzaminimi mund të tregohet qartë numri i goditjeve që ka marrë në trup, si dhe çfarë arme qështë përdorur nga autori.
Nga hetimet paraprake u konstatuan disa të shtëna, por nuk ishte e qartë nëse vinin nga një armë zjarri, pushkë, si dhe me çfarë sendesh të tjera është goditur para se ta vrisnin. Përjashtohet mundësia që dhuna të jetë bërë për grabitje pasi ai i kishte me vete të gjitha sendet personale./Opinion.al
