Prokuroria e Tiranës ka mbyllur hetimet dhe ka kërkuar dënimin me nga 25 vite burg për Faik dhe Shkëlzen Buci, babë e bir, të akuzuar për vrasjen e Englantina Bucit.
Në pretencën e dhënë këtë të enjte organi i akuzës bën me dije se babë e bir akuzohen për veprën penale vrasja me paramendim e kryer në bashkëpunim.
“Deklarojmë fajtor të pandehurin Shkëlzen Buçi për kryerjen e veprës penale vrasja me paramendim kryer në bashkëpunim dhe dënimin e tij me 25 vite burgim .Deklarojmë fajtor të pandehurin Faik Buçi për vrasje me paramendim kryer në bashkëpunim dhe dënimin e tij me 25 vite burg. Deklarojmë fajtor të Faik Buçit për prodhim dhe mbajtje pa leje të armëve të ftohta dhe dënimin me 1 vit burgim, në total me një dënim të vetëm prej 25 vitesh burg”, thuhet në pretencën e prokurorisë.
Ngjarja e rëndë ka ndodhur në vitin 2012, por është zbardhur në 2020. Asokohe në Malin me Gropa u gjet një skelet i groposur, ku pas analizave, rezultonte të ishte i Eglantina Bucit.
Për këtë ngjarje të rëndë, akuzohen babai dhe vëllai i të ndjerës. Ishte Shkëlzen Buci, vëllai i Eglantinës ai që thirri motrën e tij për kafe, teksa i shoqëronte dhe shoku i tij. Gjatë rrugës për tek Mali me Gropa, Eglantina e ka kuptuar se diçka nuk po shkonte.
Aty Shkëlzeni ka nxjerrë pistoletën dhe e ka qëlluar me një plumb. E gjithë skena është parë nga shoku. Ishte pikërisht ky i fundit që ka zbardhur krimin, edhe pse 8 vite më pas. Nisur nga kjo, shoku ka marrë statusin e të penduarit të drejtësisë./Opinion.al
