Prokuroria ka pushuar hetimet për Albert dhe Seit Manahasën, të cilët u arrestuan disa muaj më parë në lidhje me vrasjen e Emiljano Ramazanit në Elbasan.
“Abc News” raporton se babë e bir janë lënë të lirë, pasi hetimet nuk kanë zbuluar se ata janë të përfshirë në këtë ngjarje.
Arrestimi i tyre është bërë menjëherë pasi autoritetet gjetën një pistoletë “TT” poshtë një sebratori makinash në servisin në pronësi të tyre.
Ndërkohë, ende nuk është identifikuar personi i cili ka vendosur armën në sebrator. Nga pamjet është filmuar një i ri zbret dhe vendos armë në vendin ku u gjet nga policia, por nuk është identifikuar.
Ky i fundit dyshohet të jetë autori i vrasjes së Ramazanit në aksin Elbasan-Peqin. I dyshuar për vrasjen është Klevis Kapllanaj, i cili u ekzekutua një muaj më pas pranë banesës së tij me kallashnikov, në fshatin Sinaballaj të Rrogozhinës. Sipas hetimeve Emiljano Ramazani u vra nga Nuredin Dumani së bashku me Klevis Kapllanajn.
Për shkak të prishjes së pazareve mes tyre pas vrasjes së Ramazanit, dyshohet se Dumani ekzekutoi edhe mikun e tij Kapllanajn më 15 shtator.
