Familjarët e Mikel Shallarit merren në mbrojtje nga policia pas arrestimit të tij si autor i dyshuar i vrasjes së komisar Artan Cukut.
Deri në muajin tetor të vitit të kaluar, Mikel Shallari, me origjinë nga Skrapari, ka jetuar në fshatin Dikater të Kuçovës, nga ku u largua në kohën që motra e tij fitoi të drejtën e studimit në Tiranë.
Që nga ajo kohë, 24-vjeçari ishte zhvendosur për të jetuar në Qytetin Studenti bashkë me të motrën. Para tre muajsh, edhe prindërit e tij u larguan nga Kuçova drejt Tiranës, pasi i ati i tij gjeti një punë si shofer në kryeqytet.
Ndërsa thuajse çdo fundjavë ata udhëtonin drejt fshatit Dikater, që ndodhet rreth 10 kilometra larg qytetit të Kuçovës, ku bashkë me prindërit punonin tokën dhe hardhitë rreth shtëpisë. Mikel Shallari aktualisht ishte i papunë, ndërsa në Kuçovë kishte kryer punë të ndryshme.
