Bujar Daka u shpall në kërkim nga policia bashkë me vëllain e tij Florian Daka si porositës të dyshuar të vrasjes së komisar Artan Cukur. Por në një rrëfim për “News24″ Bujar Daka deklaron se nuk është ndaluar dhe as marrë në pyetje nga policia.
Ai thotë se ndodhet në shtëpinë e tij duke kryer punime.
“S’jemi ndaluar dhe as marrë në pyetje nga policia. Jam në shtëpi duke kryer punime. S’kam lidhje me vrasjen e Cukut, jam i lirë. Kam qenë në burg në Zvicër, por Mikel Shallarin nuk e njoh. Shallarin e kam parë vetëm në televizor. Nuk kam asnjë lidhje me të. Edhe vëllai, Floriani është i lirë”, ka deklaruar Bujar Daka.
Policia tha sot se dy vëllezërit Bujar dhe Florian Daka janë shpallur në kërkim pasi dyshohet se kanë porositur vrasjen e komisar Cukut me motiv hakmarrjen. Pasi vëllai i tyre Agim Daka u vra në zyrën e komisarit në vitin 2005 dhe ngjarja u raportuar si vetëvrasje.
Në foto: Bujar Daka
