Mjeku Redjan Rraja dhe efektivi i policisë së komisariatit nr. 5 Alban Trimi janë filmuar nga kamerat e sigurisë të lokalit “De Niro” teksa kanë marrë armën e viktimës, Etlon Çiço, i cili u qëllua për vdekje nga një person i paidentifikuar rreth një javë më parë në Tiranë.
Megjithëse nuk kanë lidhje me vrasjen, Trimi dhe Rraja janë nën arrest nën akuzën e prishjes së provave dhe dëshmisë së rreme në lidhje me vrasjen.
Grupi që po heton ngjarjen zbuloi se ata kanë zhdukur një pistoletë që viktima e kishte me vete dhe disa sende të tjera të tij personale, përfshirë telefonin celular.
Nga kamerat e sigurisë dallohet mjeku Rraja i cili vepron i pari, ai merr armën që ishte në çantën e Çiços, e ka mbushur dhe bashkë me policin Alban Trimi dhe kanë dalë jashtë në ndjekje të autorit. Por pasi konstatuan se vrasësi ishte larguar nga lokali, ata janë kthyer brenda në lokal ku miku i tyre ishte i shtrirë në tokë në gjendje mjaft të rëndë pasi kishte marrë dy plumba në kokë dhe një në trup.
Ata lëvizin trupin e viktimës nga tavolina dhe e vendosin në dyshemenë e lokalit për t’i dhënë ndihmën e parë Çiços, që ende ishte gjallë.
Në këto momente kamerat e sigurisë, kanë filmuar policing Alban Trimi që merr armën nga tavolina dhe telefonin e viktimës. Si arma dhe telefoni ende nuk janë shënuar në procesverbalin e bërë në vendin e ngjarjes dhe ende nuk janë gjetur nga policia.
Mësohet se Alban Trimi, në deklaratat dhënë para hetuesve nuk ka pranuar të ketë vepruar me qëllim duke lëvizur provat, por se këtë e ka bërë për t’i ardhur në ndihmë Elton Çiços.
