Mediat greke kanë publikuar ekspertizën mjeko-ligjore të vrasjes së biznesmenit shqiptar Xhani Topalli në Greqi.
Sipas ekspertizës, vdekja e 46-vjeçarit u shkaktua nga dy goditje të forta në kokë, ndërsa litari i gjetur duket se është përdorur për ta neutralizuar atë.
Të akuzuar për vdekjen tragjike të shqiptarit janë biznesmeni 53-vjeçar nga Rodosi dhe djali i tij 20-vjeçar, ndërsa shkaqet mësohet të jenë financiare dhe konkretisht, një shumë prej disa mijëra eurosh, të cilën 53-vjeçari dyshohet se i detyrohet për punën që kishte bërë në biznesin e tij në vitin 2019 shqiptari.
Nga këqyrja e kryer në trupin e viktimës nga mjeku, Panagiotis Kotretsos, janë konstatuar dy goditje në kokë nga të cilat janë shkaktuar lëndime. Nga këto plagë, sipas ekspertizës, shqiptari 46-vjeçar ka ndërruar jetë.
Megjithatë, sipas mediave greke vlen të përmendet edhe fakti që nga ngjarja ka kaluar një periudhë rreth dhjetë ditë dhe për shkak të nisjes së dekompozimit të trupit mund të kenë ndryshuar apo “zhdukur” elementë të tjerë të vrasjes që mund të kenë qenë aty.
Mirëpo, babë e bir, të paktën në hetimet paraprake, deklarojnë se vrasja ka qenë një aksident pasi siç thanë, ka ndodhur një incident me 46-vjeçarin shqiptar, i cili në gjendje të dehur dyshohet se ka sulmuar 20-vjeçarin. Në përpjekje për të shpëtuar fëmijën e tij, pra për t’u mbrojtur, hotelieri hyri në mes të konfliktit dhe goditi biznesmenin shqiptar, i cili si pasojë e plagëve të marra ndërroi jetë.
