Xhani Topalli u vra nga pronari i një hotelit në ishullin e Rodosit në Greqi. Në lidhje me ngjarjen ka folur për median greke protothema.gr vëllai i viktimës, Kristo Topalli. KristoTopalli ka deklaruar se që nga dita e parë e zhdukjes së të vëllait të shtunën e 28 gushtit, ishte i bindur se diçka e keqe i kishte ndodhur, pasi dinte gjithçka për borxhin prej 100 mijë eurosh që i kishte hotelieri, ku rreth tre vite më parë ai kishte ndërtuar një hotel me paratë e Xhanit.
“Të gjithë jemi në zi për humbjen e Xhanit. Fatkeqësisht, që në momentin e parë që i humbën gjurmët, kuptuam se i kishte ndodhur diçka e keqe. Vëllai im ishte një njeri profesionist dhe familjar. Të gjithë këtu në Falirak e njihnin dhe e donin. Dija gjithçka për borxhin e hotelierit”-u shpreh vëllai i viktimës.
Pas zhvillimeve të fundit, familja e Xhani Topallit ia ka ngarkuar çështjen avokatit nga Rodosi, Minas Tserkis, i cili e njihte edhe personalisht biznesmenin.
“Hotelieri ka qenë njeriu që ka pasur një takim me Xhanin përpara zhdukjes së tij. Ai vetë hasi në shumë kontradikta në dëshminë e tij, prandaj ne menjëherë besuam se ai kishte bërë diçka të keqe. Ky person është arrestuar së bashku me djalin e tij pas krimit që kanë bërë. Ai kishte tre vjet që tallte Xhanin për paratë që i kishte borxh. Hoteli i tij u ndërtua nga i ndjeri duke paguar pothuajse tërësisht të gjithë stafin vetë. Tjetri i premtoi se do t’i jepte pak nga pak këto para, rreth 100 mijë euro”, deklaroi avokati.
Për paratë që i detyrohej Xhani Topallit, hoteleri kishte firmosur edhe një dokument njohjeje borxhi para avokatit. “Dy vite më parë erdhën edhe në zyrën time dhe u firmos njohja e borxhit. Hotelieri kishte firmosur se i kishte borxh 100 mijë euro. Katër ditë para vrasjes së Xhanit e kisha takuar dhe e kisha pyetur për këtë. Në fakt, viktima më tha se hoteleri i kishte dhënë rreth 2000 euro. Në dëshminë e tij, hoteleri ka gënjyer se e ka paguar dhe i ka dhënë 15 mijë euro shtesë. Ky ka qenë edhe gabimi që ka bërë, pasi u ngritën dyshimet e familjes. Ai mendoi se kishte siguruar një alibi dhe ishte kujdesur për gjithçka”, shtoi më tej avokati.
Sipas avokatit Mina Tsekris, vrasja e Xhani Topallit ishte një krim i paramenduar.
“Alibia e tij u shemb dhe ai ra nga kontradikta në kontradiktë. Xhani ishte një person i shkëlqyer, një familjar i përkushtuar dhe nuk i detyrohej askujt. Ai nuk e meritonte këtë fund. Nga sa dëgjojmë dhe lexojmë bëhet fjalë për një krim të paramenduar nga hotelieri dhe djali i tij. Ai mendonte se kishte siguruar një alibi dhe ishte kujdesur për gjithçka. Ai i kishte hequr regjistruesit nga hard disku”, deklaroi avokati./Opinion.al
