Gjykata e Tiranës shtyu sot vendimin për masën e sigurisë për të dyshuarin kryesor për vrasjen e Hekuran Billës, Viktor Markun. Gjykata argumentoi se kërkon kohë për të vlerësuar procedurën e arrestin dhe dërgimit në Tiranë të Markut.
Viktor Marku u arrestua në Malin e Zi dhe tentoi të largohej prej andej me një identitet tjetër.
Autori i dyshuar është vëllai i Prel Markut, i vrarë nga Billa në vitin 2006 në Angli. Për vrasjen e Markut dhe plagosjen e tre personave të tjerë, gjykata angleze e kishte dënuar Billën me burgim të përjetshëm.
Në vitin 2013, ai u ekstradua drejt Shqipërisë dhe nisi përballjen me drejtësinë e vendit tonë. Por Billa arriti të dalë nga burgu në vitin 2019, pasi fitoi disa ulje dënimi radhazi.
Gazetarja Klodiana Lala, raportoi disa detaje nga dosja hetimore për Viktor Markun. Ajo bëri me dije se në funksion të dosjes hetimore janë analizuar pamjet nga 38 kamera sigurie pranë zonës.
Organi i akuzës ka dyshime se Viktor Marku shfaqet në një moment në kamera teksa zbret nga makina Smart, marrë me qira dhe ngjitet në automjetin ‘Mercedez Benz’ i vjedhur në Shkodër që u përdor në atentat. Prokuroria thotë se në makinë është ngjitur dhe një person i dytë.
Lala shtoi se sipas sistemit TIMS, Marku rezulton të ketë dalë nga Shqipëria nga pika e Muriqanit për në drejtim të Malit të Zi, në 19 janar 2020, por një dëshmitar thotë se Viktor Marku gjatë ketyre muajve ka qënë në Shkodër pasi mori me qira në biznesin e tij një makinë ‘Smart’.
Sipas dëshmisë makinën Marku ia ka lënë nipit të tij, Sebastjan Mali, gjithashtu i arrestuar si bashkëpunëtor në vrasje.
Një ditë më parë Gjykata la në burg Sebastian Malin, edhe pse ai ka mohuar pjesmarrjen e tij në vrasjen e Billës, duke thënë se policia po e akuzon vetëm për shkak të gjakmarrjes dhe armëmbajtjes pa leje./Opinion.al
