Gjykata e Tiranës dënoi me burgim të përjetshëm Bledar Jambellin dhe Kristaq Lecin për vrasjen e kryekomisarit Artan Cuku.
Gjykata pranoi kërkesën e prokurorisë, e cila rreth dy javë më parë kërkoi dënimin me burgim të përjetshëm të të dyve, si autorë të vrasjes së kryekomisiarit, ngjarje që ka ndodhur në vitin 2017.
Ekzekutori fizik i Cukut ishte në fakt Mikel Shallari, por ky i fundit u bë i penduar i drejtësisë. Kësisoj hetimet treguan se ngjarja kishte motiv detyrën e ish-drejtorit të Policisë së Vlorës.
Bledar Jambelli ishte arrestuar në vitin 2012 nga Drejtoria e Policisë në Vlorë, e cila e hetonte prej vitesh atë si autor të një vrasjeje të dyfishtë, në kohën kur kjo drejtohej nga Artan Cuku.
Pikërisht për këtë shkak, në vitin 2017, Prokuroria thotë se Jambelli, në shenjë hakmarrjeje, përgatiti vrasjen e ish-drejtorit të Policisë së Vlorës. Ai bashkëpunoi me Kristaq Lecin dhe Mikel Shallarin.
Ky i fundit, në cilësinë e bashkëpunëtorit të drejtësisë, tregoi për hetuesit se iu premtua pagesë rreth 20,000 euro dhe dërgimi në Gjermani pasi të kryente vrasjen.
Dy armët e llojit pistoletë, njëra tipit Zastava dhe tjetra Glock me silenciator, ia dha Kristaq Leci, ndërsa vetë tha se u vendos në ndjekje të viktimës nga larg, duke e marrë në vëzhgim.
Shallari qëlloi ndaj kryekomisarit Artan Cuku me 8 plumba, në hyrje të ashensorit të pallatit ku ai jetonte./tvklan
