Policia ka sekuestruar armën dhe makinën e përdorur nga Habib Rexha, në vrasjen e Arjan Gosës, ngjarje e ndodhur pak ditë më parë në një lokal në qytetin e Kavajës.
Arma u sekuestrua pas dëshmisë së dhënë nga Rexha para grupit të hetimit, i cili tha se pistoletën e kishte hedhur në afërsi të pistës “Iliria” në Durrës. Ndërkaq, edhe automjeti i përdorur nga Rexha është gjetur po në Durrës.
Ngjarja e rëndë ndodhi më 21 maj, kur Arjan Gosa u qëllua me plumb në kokë në sy të babait të tij, me të cilin kishte dalë për të pirë një kafe në një lokal pranë shtëpisë së tij në Kavajë.
Motivi pse 31-vjeçari ka ndërmarrë këtë akt të rëndë dyshohet se është hakmarrja, pasi dy muaj më parë, vëllai i Gosës dhe vëllai i tij u konfliktuan me njëri-tjetrin në mes të Kavajës dhe të dy mbetën të vrarë.
Ndërkaq, ditën e djeshme Habib Rexha u vetëdorëzua në polici me vullnet të lirë dhe pas kërkesës së familjes./Opinion.al
