Muhamet Rrumbullaku, Drejtori i Përgjithshëm i Policisë së Shtetit ka dalë në një konferencë për shtyp në lidhje me rastin e vrasjes së biznesmenit Ardian Nikulaj në Shëngjin.
Rrumbullaku renditi provat e gjetura ndërsa njoftoi se janë shpallur në kërkim disa persona në lidhje me vrasjen e Nikulajt, mes tyre një me shtetësi shqiptaro-britanike, një portugez dhe 4 të tjerë britanikë. Sipas Rrumbullakut këta shtetas janë larguar nga territori i Shqipërisë, ndërsa autoritetet po vijojnë punën për gjetjen dhe kapjen e tyre.
Të dyshuarit si autorë të vrasjes; E.H, me shtetësi shqiptare dhe britanike, R.R.S, shtetas portugez, H.H shtetas britanik, H.B shtetase britanike, H.M shtetas britanik, S.P.H shtetas britanik.
Rrumbullaku deklaroi se motivi i vrasjes ka qenë gjakmarrja. Ndërkohë, grupi hetimor po bashkëpunon me partnerët dhe strukturat ligjzbatuese ndërkombëtare, për kapjen e autorëve të kësaj ngjarjeje kriminale, të cilët janë larguar nga territori i Republikës së Shqipërisë, pas kryerjes së krimit.
“Jemi sot për të komunikuar veprimtarinë hetimore për ngjarjen kriminale në Shëngjin ku është vrarë me armë zjarri Ardian Nikulaj. Pas ngjarjes, u ngrit një grup i posaçëm hetimor, me qëllim dokumentin dhe zbardhjen e autorësisë. Policia e Shtetit e vlerëson këtë ngjarje dhe për zbardhjen janë sekuestruar një sërë provash që shërbejnë për dokumentin e ngjarjes. Janë gjetur gëzhoja, armë zjarri, , telefon dhe disa prova të tjera biologjike. Janë dokumentuar veprimet e autorit të dyshuar dhe e gjithë dinamika e shtetasve të përfshirë në këtë ngjarje kriminale. Janë siguruar prova shkencore biologjike të pakundërshtueshme”, tha ai.
