Vrasja e regjistruar në fshatin Xibër, Klos, ka lënë pas saj familjarë me pikëpyetje për motivin e krimit, ashtu sikurse dhe trishtim.
Ka qenë 28-vjeçari, Hazbi Velsula, i cili vrau me mjet prerës kushëririn e tij, Selim Velsula, 65 vjeç, në rrethana të paqarta.
Një i afërm i familjes sqaron se brenda familjes nuk ka pasur mosmarrëveshje, teksa sqaron se kanë pasur gjithnjë hyrje e dalje tek njëri-tjetri për çdo rast.
“Të dy familjet, ne hymë e dalim. Për morte, për dasëm, për raste fatkeqësish edhe për gëzime. Gjithmonë kemi hyrë e kemi dalë me njëri-tjetrin. Jemi fis i hershëm qysh nga baballaratë tanë dhe e kemi trashëguar e ne”, u shpreh i afërmi.
Ai shprehet se ende nuk e di përse ka ndodhur krimi, teksa shton se “Unë them se ai çuni që ka bërë këtë vrasje, ka qenë në depresion. Më i ri, është i pamartuar, nuk është familjar akoma. Ky tjetri, i janë rrit fëmijët, viktimës, a kupton? Janë kushërinj”
I pyetur nëse ka pasur ndonjë hasmëri, ai u përgjigj “Jo, jo. S’kemi pasur. Jemi fisi Velsula, ne këtu dhe ata atje lart.”
Për sa i përket autorit, i afërmi shprehet se “Ai jeton në Tiranë. Familjarisht jetojnë në Tiranë. Vijnë, punojnë tokat dhe prindërit”
Po kështu, i pyetur nëse autori ka ardhur shpesh në fshat, ai tha se nuk ka ardhur shpesh, madje kanë konsideruar se ai mund të ketë emigruar diku.
“Jo, s’ka ardhur shpesh. Ne mendonin se ishte jashtë shtetit, ca thoshin në Greqi, ca thoshin ishte në Itali. Përfundimisht, ndodhi kjo që na ndodhi. E padëshiruar po…”, përfundoi ai.
Kunati i viktimës, ka dhënë gjithashtu një prenoncim. Edhe ai pohon se nuk ka pasur dijeni për ndonjë mosmarrëveshje të mundshme brenda familjes.
“Ne s’dimë asgjë. Edhe viktima mua s’më kishte thënë gjë se ka mosmarrëveshje”, tha ai.
Ai sqaron se ata kanë qenë fqinjë.
“Po komshinj, një fis dhe ne s’kemi ditur asgjë. Me këtë të dilnim, edhe e pyesja. Paradite ai ka qenë në pyll duke marrë dru. S’dihet asgjë, s’ka pasur njeri tjetër aty”, tha ai.
Kunati i 65-vjeçarit sqaron se ka qenë një elektricist që ka gjetur viktimën.
“Një elektricist, ka qenë duke punuar te kanali. Ka qenë me një fuoristradë, ka kaluar dhe e ka parë të shtrirë në tokë. Ai ka qëndruar aty deri sa ka ardhur policia. Atëhere ka njoftuar këta të tjerët që ishin në kanal, duke hapur kanalin vaditës, edhe janë mbledhur”, tha ai.
Ngjarja ndodhi dje. Autori i vrasjes, u arrestua mbrëmë në zonën e Alliasit, pranë banesës së tij. Autori i arrestuar është Hazbi Velsula, ndërsa viktima, Selim Velsula. Ky i fundit u gjet në rrugën që të çonte te shtëpia e tij, me plagë në kokë e në gjoks.
Rrethanat dhe motivet e ngjarjes janë ende të paqarta, por dyshimet e para qëndrojnë tek aspekti i pronave. Sakaq, hetimet për ngjarjen vijojnë./tvklan
