Prokuroria e Durrësit pushon çështjen për vjehrrin e Jurgen Kurtit që u arrestua 3 muaj më parë për vrasjen e Agim Arapit.
Organi i akuzës e la të lire Kostandin Ekonomin (vjehrri i Jurgen Kurtit), njëri prej dy vëllezërve të akuzuar për vrasjen me mjete prerëse të 60 vjeçarit, ndërsa po heton për këtë ngjarje vëllanë tjetër Kujtim Ekonomi.
Lirimi i një prej dy vëllezërve ka sjelle reagimin e bashkëshortes së viktimës, Vjollca Arapi, dëshmitarja e vetme në vendngjarje.
Në mënyrë të vazhdueshme ajo ka provuar me foto dhe video se vrasjen e bashkëshortit të saj e kishin kryer dy vëllezërit Ekonomi dhe dhëndri i tyre Jurgen Kurti, por në burg tani ka mbetur vetëm njëri nga tre autorët.
Shkak për krimin e rëndë u bë qiraja mujore prej 13 mijë lekësh (të rinj) për tubin e aspirimit.
Vëllezërit Ekonomi kishin hapur një piceri ngjitur me dyqanin ushqimor të Agim Arapit. Ata kishin rënë dakord që tubat e aspirimit të picerisë të kalonin përmes dyqanit të Arapit kundrej një pagese prej 13 mijë lekësh në muaj.
Pasi kishin kaluar disa muaj nga hapja e picerisë vëllezërit nuk i kishin paguar asnjë lek Agim Arapit që në sherr e sipër i morën jetën në ambientet e dyqanit të tij mbrëmjen e 11 prillit të këtij viti.
Nga ana tjetër, Jurgen Kurti nuk është emër i panjohur për drejtësinë dhe as për publikun. I njohur si menaxheri i VIP-ave ai u akuzua para një viti edhe për vrasjen e të atit, por më pas doli i pafajshëm dhe për krimin u dënua daja e tij. Edhe në ngjarjen e Durrësit, ku mbeti i vdekur Agim Arapi, Jurgen Kurti ka qenë në vendngjarje dhe u dyshua se ka marrë pjesë në krim bashkë me vjehrrin dhe vëllanë e vjehrrit, por u la i lirë disa ditë pas ngjarjes.
/Opinion.al
*fotot e viktimes jane publikuar nga bashkeshortja e tij Vjollca Arapi
