Mbetet ende i mbuluar me mister ekzekutimi i 58-vjeçarit Renato Hoxhaj mëngjesin e së dielës në lagjen “Hajro Çakëri” të Vlorës sapo ai kishte dalë nga shtëpia.
Kamerat e sigurisë në zonë kanë fiksuar autorin, i cili qëlloi 3 plumba mbi 58-vjeçarin duke i marrë jetën në vend. Gjithsesi policia nuk ka mundur ende ta identifikojë atë, për shkak se ai mbante një kapele dhe shall për të mbuluar fytyrën.
Hetuesit kanë marrë dëshmitë e familjarëve dhe të afërmve të tij në përpjekje për të zbuluar nëse viktima kishte pasur konflikte. Në komisariat u paraqit edhe bashkëjetuesja e tij e cila në një intervistë për Tv Klan thotë se në momentin e ngjarjes ishte në banesë dhe ka dëgjuar vetëm krismat.
“Më pyetën vetëm për këtë. Pe gjë më thanë, nuk pash gjë i thashë unë. Unë s’pashë gjë. Unë isha brenda i thashë. Unë e dija se ishin fishekzjarrë i thashë. Mendova i thashë se ishin fishekzjarrë”.
Ajo thotë se nuk ishte në dijeni të ndonjë konflikti të 58-vjeçarit.
“Jo, jo. As më ka thënë asgjë. Të më thoshte mua kam këtë e atë, s’më thoshte fare. Se ai dilte, ikte”.
Renato Hoxhaj, i divorcuar dhe baba i 3 fëmijëve kishte punuar si roje në një objekt në ndërtim, punë që e kishte lënë rreth 1 vit më parë.
Tv Klan
