Mbi 15 persona janë shoqëruar nga policia për tu marrë në pyetje lidhur me atentatin e mbremshën në Sukth ku mbeti i vrarë Arben Mërkuri (Ismaili), 48-vjeç.
Mësohet se kamerat e sigurisë kanë fiksuar 3 persona si autorë, por që është e vështirë identifikimi i tyre.
Dyshohet se Mërkuri është ndjekur prej disa kohësh nga autorët, të cilët kanë ruajtur të gjitha lëvizjet e tij dhe në momentin që ka qenë i vetëm në biznesin e kanë qëlluar.
Kanë qenë të paktën 3 persona në makinë, ku njëri ka zbritur dhe është futur në dyqan duke e qëlluar dhe më pas është larguar me shpejtësi nga vendi i ngjarjes me mjetin Benz tip GLE ngjyrë gri. Mërkuri mori plagë të rënda dhe ka qenë djali i tij i mitur i cili ka lajmëruar fqinjët që babi i tij është plagosur dhe kanë qenë këta të fundit që e kanë dërguar në spital ku dhe ka ndërruar jetë si pasojë e plagëve të marra.
Pista kryesore e hetimit është ajo e përfshirjes në konflikte të mëparshme dhe larje hesapesh, pasi Mërkuri është një emër i njohur për policinë e qytetit dhe jo vetëm.
‘Maneci’ një emër i njohur për Policinë e Shtetit, dyshohet i përfshirë edhe në dhunën e ushtruar ndaj biznesmenit amerikano-libanez, Faadi Mitri pranë kryqëzimit të Laknasit, pasditen e 10 shtatorit 2016 për shkak të investimit që po kryente në zonën e Gjirit të Lalzit. Por përveç kësaj ngjarjeje, ai dyshohet edhe si vrasës me pagesë, por që asnjëherë nuk u arrit të dokumentohej.
Arben Mërkuri njihet si mik i Landi Muharremit, Rrumit të Shijakut, por që për shkak të një konflikti nuk shoqëroheshin më. Landi Muharremi ka qenë në makinë me prokurorin Arjan Ndoji ditën që këtij të fundit iu bë atentat, ku mbeti i vrarë shoferi i prokurorit. Pistat kryesore të hetimit është prishja e pazareve të drogës, kjo për shkak se viktima ka vuajtur dënimin në Itali për trafik narkotike, por edhe larja e hesapeve. 48-vjeçari ka qenë gjithashtu një nga personat e dyshuar që ka marrë pjesë në ekzekutimin e 4 viteve më parë të Ervin Dalipajt dhe Juxhin Dautajt.
Mërkuri ka në pronësi një objekt 3 katësh, një dyqan kancelari, një market në Sukth, një dyqan që ende nuk e kishte hapur, ku dhe ndodhi ngjarja si edhe një kompani që merret me mbarështimin e pulave. Madje së fundmi ai është përfshirë në një ngjarje ku ka tentuar që t’i thyejë kamerën një gazetareje investigative, pasi po denonconte se ka groposur pulat me grip shpendësh në mënyrë të paligjshme. Nga sa mësohet, në Itali është i dyshuar se ka vrarë një prostitutë.
