Një 45-vjeçar shqiptar është ekzekutuar me armë zjarri në Itali. Ngjarja ka ndodhur mbrëmjen e së shtunës në Romë rreth orës 23:30 minuta, në zonën e quajtur Tufello.
Sipas mediave italiane referuar edhe burimeve të policisë, viktima ka qenë person me precedent penal dhe në momentin që ai është qëlluar ka qenë duke u rikthyer në burg pasi kishte dalë me leje.
Shqiptari kishte takuar bashkëshorten e tij, por vetëm pak metra larg banesës ai u qëllua dy herë me pistoletë, një plumb e goditi në pjesën e kokës dhe një tjetër në gjoks. Autoritetet Italiane shprehen se atentati ishte i mirëorganizuar, ndërkohë kanë nisur hetimet për kapjen e autorit.
Ndërkohë, hetuesit po përpiqen të rindërtojnë lëvizjet e 45-vjeçarit dhe kontaktet e fundit që ai kishte. Zona e vrasjes ndodhet në kufi me Tufellon, e cila përdoret më së shumti nga trafikantët e të gjitha llojeve të lëndëve narkotike, duke sjellë dhe një numër të lartë vrasjesh në këtë zonë.
Marrë shkas nga e shkuara e viktimës, hetuesit mendojnë se ngjarja ka ndodhur për larje hesapesh mes bandave. Autoritetet shprehen se po në këtë zonë, ka grupe kriminale që drejtohen nga shqiptarë, të cilët organizojnë shpërndarjen e lëndëve narkotike si kokainë, hashash dhe marijuanë./ Opinion.al
