Policia ka arrestuar dy personat e plagosur të cilët u përfshinë gjatë orëve të mbrëmjes në një konflikt me armë zjarri në Velipojë, ku humbën jetën 4 persona.
Të arrestuari janë Hasan Ferracaku 54 vjeç si dhe nipi i tij 17-vjeçari Elmilind Dyli të cilët janë në Spitalin e Traumës në Tiranë. Dy të arrestuarit akuzohen “Vrasja në rrethana të tjera cilësuese, kundër dy ose më shumë personave” dhe “Prodhimi dhe mbajtja pa leje e armëve luftarake dhe municionit”, në bashkëpunim.
Viktimat e konfliktit të mbrëmeshëm janë Kujtim Ferracaku, dhe 2 anëtare të familjes Gocaj, Xhovani Gocaj, Edmond Gocaj. I vdekur ka mbetur edhe Myzerim Zeneli punonjësi i shezlongëve, vetëm 20 vjeç.
Gjithashtu janë shpallur në kërkim dy vëllezërit A. V., Sh. V. dhe B. V., banues në fshatin Pulaj, Velipojë, bashkia Shkodër, të dyshuar si bashkautorë në këtë ngjarje, për kryerjen e veprave penale “Vrasja në rrethana të tjera cilësuese, kundër dy ose më shumë personave” dhe “Prodhimi dhe mbajtja pa leje e armëve luftarake dhe municionit”, në bashkëpunim.
Në cilësinë e provës materiale janë sekuestruar dy armë zjarri pistoleta, njëra prej të cilave u gjet në vendngjarje, ndërsa tjetra u gjet gjatë kontrollit në hotelin e familjes Gocaj.
Grupi hetimor, nën drejtimin e Prokurorisë, vijon punën për zbardhjen e plotë të rrethanave të ngjarjes, identifikimin dhe kapjen e personave të tjerë të përfshirë në konfliktin me armë./ Opinion.al
