Vrasja e 36-vjeçarit Elton Çiço mbrëmjen e së dielës, dyshohet se ka lidhje me një konflikt të ndodhur një vit me parë, kur dy grabitës hynë në shtëpinë e viktimës në Tepelenë dhe grabitën 5 mijë euro.
Mbrëmjen e 31 marsit të vitit të kaluar, dy persona hynë në shtëpinë e Çiçajt, në lagjen “Demokracia” ku ndodheshin dy prindërit e tij dhe i dhunuan. Për shkak të asaj dhune, i zoti i shtëpisë Naimi dhe e shoqja e tij, të dy të moshuar u desh të qëndronin disa javë në spital nga dëmtimet e marra.
Policia shpalli në kërkim si të dyshuar për grabitjen Robert Ramën dhe Elvis Imerin.
Në 8 qershor të vitit 2015 në një lokal në zonën e ish Kënetës në Durrës, në një atentat mafioz ekzekutohet me armë zjarri Robert Rama. Policia bëri me dije se 31 vjeçari ishte një nga autorët e grabitjes se 31 marsit në Tepelenë.
Ndërkohë më 8 korrik të vitit të kaluar, të dyshuarit tjetër për grabitjen e familjes Çiçaj, biznesmenit të duraluminit Ervis Imerit iu bën një atentat me eksploziv. Ai mundi të shpëtojë pasi arriti të gjente lëndën plasëse që i ishte vënë në automjet.
Pas tij, në shënjestër u vu i vëllai Eltoni, një ish oficer i Policisë Ushtarake në Durrës. Mëngjesin e 8 dhjetorit në Kombinat Elton Imeri ra pre e një atentati me eksploziv në automjetin e tij, në të cilin humbi njërën këmbë.
