Ditën e djeshme u gjet i vrarë me një plumb në kokë në fshatin Zall Xhuxhë të Fanit në Mirditë, 34-vjeçari Eri Zefi (Anton Zefi ) i cili më pas ishte hedhur në një kanal.
Kufoma e Zefit u gjet nga kalimtarët e rastit të cilët njoftuan forcat e policisë, por deri më tani autoritetet ende nuk kanë mundur të bien në gjurmët e autorëve, ndonëse në policia ka shoqëruar disa persona.
Por, vendi ku u gjet viktima është zonë e pabanuar, çka vështirëson punën e grupit hetimor për të zbardhur dinamikën e krimit. Ndërkohë, dyshohet se i riu është marrë peng dhe më pas është ekzekutuar me armë në fshatin Zall Xhuxhë të Fanit në Mirditë.
Pista kryesore për vrasjen e të riut dyshohet se është hakmarrja, pasi viktima Eri Zefi rezulton të jetë vëllai i Ndue Zefit i cili në muajin shkurt të këtij viti ka vrarë fqinjin e tij 45-vjeçarin Martin Ndreca, ngjarje e ndodhur në qytetin e Durrësit.
Krimi ndodhi pas një sherri në lokal në sy të djalit 10-vjeçar të Martin Ndrecës. Pak ditë pas krimit të kryer, Ndue Zefi është vetëdorëzuar në Policinë e Shkodrës dhe vijon të qëndrojë në burg në pritje të dënimit që do ti japë Gjykata e Durrësit.
Dy familjet Ndreca dhe Zefi ishin nga Mirdita dhe prej vitesh ishin zhvendosur me banim në qytetin e Durrësit. Hetimet e policisë janë përqendruar pikërisht tek hasmëria mes dy familjeve, por nuk përjashtohet mundësia që 34-vjeçari të ketë patur ndonjë konflikt tjetër, çka ka çuar në ekzekutimin e tij me armë zjarri./ Opinion.al E.Xh.
