Tensionet mes Turqisë dhe regjimit sirian, që mbështetet nga Moska zyrtare, janë gjithnjë e më të tensionuara.
Kështu, duke iu përgjigjur vrasjes së 34 ushtarëve turq nga një sulm i forcave qeveritare siriane në veriperëndim të zonës së Idlibit, Ankaraja vendosi të nisë një ofensivë ushtarake ndaj regjimit të Assad-it duke rrëzuar dy avionë luftarak sirianë, ndërsa ka shkatërruar më shumë se 100 tanke.
Ministri turk i mbrojtjes, Hulusi Akar, njoftoi zyrtarisht nisjen e operacionit, “Mburoja e Pranverës”, ndërsa u zotua se për çdo sulm ndaj forcave turke në Idlib “do të ketë hakmarrje”.
Konflikti mes Ankarasë dhe Damaskut u shoqërua edhe me tensionim të marrëdhënieve mes Turqisë dhe Rusisë.
Nga ana e tij, Erdogani vendosi të mos pengojë më fluksin e emigrantëve sirianë që i drejtohen vendeve të Evropës, pas kritikave nga vendet e BE-së për sulmet në Siri. Ekspertët paralajmërojnë se hapja e kufijve do të sillte një përsëritje të krizës së emigracionit të viteve 2015-2016, kur më shumë se 1 milionë sirianë mbërritën përmes detit në Greqi./Opinion.al
