Detaje të reja kanë dalë nga ngjarja e rëndë e ndodhur pas mesnatës në Rrugën “4 Dëshmorët” në kryeqytet, pranë gjimnazit “Partizani”, ku mbeti i vrarë një 20-vjeçar.
Stiven Toshkesi u qëllua me thikë pas një sherri dhe nuk ka mundur t’i mbijetojë plagëve të rënda. Sipas Report Tv, konflikti ka nisur për një vajzë.
Njëri prej 18-vjeçarëve ngacmonte të dashurën e 20-vjeçarit dhe për këtë shkak 2 javë më parë në Rrugën e Elbasanit ata ishin zënë. Stiven Toshkesi i kishte rrahur atë ditë me grushte e shqelma.
Për këtë episod, Maze dhe Hoxhaj, morën hak në orët e para të mëngjesit, ku u takuan me Toshkesin dhe pasi u konfliktuan verbalisht, e qëlluan me thikë.
Ngjarja e rëndë ndodhi rreth orës 00:35. Pak orë pas ngjarjes policia arrestoi një prej autorëve të vrasjes, 18 vjeçarin Ensi Maze, ndërkohë që është ende në kërkim bashkëmoshatari i tij, Axel Hoxhaj.
