Motori dhe arma e krimit duket se janë fokusi kryesor ku janë përqendruar hetimet për zbardhjen e vrasjes së 19-vjeçarit Erjon Xhenje mbrëmjen e së dielës në Shkodër. Burime nga grupi i hetuesve thanë se nga këqyrja e kamerave të sigurisë nuk ka qenë e mundur që të përftohen të dhëna të vlefshme për identifikimin e dy autorëve. Ata kanë qenë të maskuar dhe të veshur me të zeza.
Në vendin e ngjarjes janë gjetur 7 gëzhoja pistolete të cilat gjithashtu po analizohen. Por motori i djegur në lagjen Guerrile pas ngjarjes dhe arma e lënë pranë tij po analizohen sërish nga ekspertët me shpresën tek ndonjë gabim i autorëve. Sa u përket pistave të hetimit ato mbeten të fokusuara te konfliktet e familjarëve të të riut pasi vetë viktima nuk njihej si problematik dhe nuk kishte precedentë penalë.
Hetuesit janë duke shqyrtuar konfliktet e djemve të xhaxhait të viktimës, Sehar dhe Shkëlzen Xhenje, të cilët janë emra të njohur për policinë e Shkodrës. Hetuesit janë duke shqyrtuar edhe një tjetër ngjarje kriminale në qytet me dyshime se mund të jetë e lidhur me atentatin e fundit. Policia nuk ka ende të ndaluar ndërsa pas marrjes së dëshmive ka lënë të lirë dëshmitarët e ngjarjes./Tv Klan
