Dardan Krivaqa, 29-vjeçari që dyshohet se është autori i vrasjes së 18-vjeçares Marigona Osmanin në Ferizaj është një person i njohur për drejtësinë kosovare.
Sipas të dhënave të publikuara në mediat kosovare, Krivaqa rezulton të jetë autori i 122 veprave kriminale. Përkatësisht, ai rezulton autori i 116 rasteve të vjedhjes, ku 12 prej tyre janë pranuar nga 29-vjeçari dhe 5 raste të dhunës.
Mësohet gjithashtu se ai në vitin 2017 ka ushtruar dhunë edhe ndaj ish-të dashurës së tij. Ndërsa më 10 qershor të vitit 2017 ai ka sulmuar me thikë një familjar të ish të dashurës, sepse ai kishte tentuar ta largonte nga dhuna të afërmen e tij. Lidhur me këtë rast, policia ka hetuar ndaj Krivaqës për veprën penale “lëndim i lehtë trupor”.
29-vjeçari, në fund të vitit 2020 ka qëlluar me thikë edhe një efektiv policie të identifikuar si Z.H. Për këtë vepër Krivaqa ishte dënuar me 180 ditë burgim ku janë llogaritur edhe ditët e kaluara në paraburgim.
Vdekja e 18-vjeçares ndodhi disa ditë më parë në Ferizaj, ku dy të rinjtë pasi e dhunuan e lanë në derën e spitalit të Ferizajt.
Dardan Krivaqa dhe Arbër Hajdari janë kapur nga kamerat, duke hedhur 18-vjeçaren përtokë në derën e spitalit me 21 gusht, ndërsa tashmë janë vënë në pranga nga policia./Opinion.al
