Pavarësisht se ndodhi në mes të ditës, në një zonë të populluar, policia nuk ka asnjë të ndaluar për vrasjen e Feriz Bardhit në Durrës. Policia ka shoqëruar rreth 17 persona të ndryshëm në cilësinë e personave që mund të kenë dijeni mbi ngjarjen, ndërsa pista kryesore për krimin mbetet ajo e larjes së hesapeve, për shkak të konflikteve mes grupeve rivale në fushën e trafikimit të narkotikëve. Nuk përjashtohen as konflikte personale të viktimës me autorët e krimit.
Para se të vdiste Feriz Bardhi mori një mesazh nga ekzekutorët. Sipas ekspertëve të policisë në 15 sekonda autorët e ekzekutimit folën me 40-vjeçarin. Ndaj tij ata kishin zbrazur breshëri plumbash, por ai ndërroi jetë në spital.
Policia beson që edhe vendi i zgjedhur siç është shtëpia e viktimës për të kryer ekzekutimin nuk është rastësore. Porositësit, nëpërmjet këtij veprimi kanë dashur t’i dërgojnë një mesazh të fortë edhe të tjerë personave të konsideruar “rival në boten e krimit”.
Hetuesit e çështjes thonë se në automjetin që u gjet i djegur në Fushë Kruje dhe që u përdor nga autorët për t’u larguar nga vendi i ngjarjes kanë gjetur prova që i shërbejnë hetimit.
Një nga dy armët e gjetura në automjet është përdorur në eliminimin e 40-vjeçarit. Sendet e gjetura janë dërguar në laboratorin e kriminalistikës./ Opinion.al
