Emisioni Uniko nga Spartak Koka në Klan Plus ka publikuar momentet e eksperimentit hetimor dhe të kqyrjes fizike të të dyshuarit Fatmir Hoxhaj, që akuzohet se është vrasësi i Ahmet Toskës, krim i ndodhur në Fier më 26 Tetor 2020.
Në këto pamje bëhet kqyrja fizike e Fatmir Hoxhajt duke e krahasuar me vrasësin që shfaqet në pamjet e kamerave të sigurisë.
Në prani të avokates së tij, grupi hetimor i ka veshur Hoxhajt rroba të ngjashme me ato të autorit.
Në dosjen e Prokurorisë së Fierit evidentohet se vrasësi në kamerat e sigurisë ka një ecje atipike.
Ndërsa në eksperimentin hetimor që është bërë nga hetuesit, është thënë se ecja e Fatmir Hoxhajt është normale dhe se nuk ka ngecje ose devijim të lëvizjes së këmbëve.
Familjarë të Fatmir Hoxhajt, në një intervistë për emisionin Uniko, kanë thënë se ai është i pafajshëm. Në një ekspertim privat që kanë bërë në Itali dhe Shqipëri, nga krahasimi i trupit të vëllait të tyre me atë të autorit që shfaqet në video, ka dalë që nuk janë i njëjti person. Ata kërkojnë që Prokuroria të bëjë të njëjtin ekspertim shkencor.
Fatmir Hoxhaj mbahet prej 3 vitesh i arrestuar. Ai u kap disa ditë më vonë pas vrasjes teksa u kthye nga Italia në Shqipëri, ku banon prej 30 vitesh, pasi u njoftua se në banesën e tij në lagjen “Sheq i Madh” të Fierit kishte shkuar policia për kontroll./tvklan.al
