Deputeti i Partisë Demokratike, Saimir Koreshi, ka kërkuar anulimin e votimeve të javës së kaluar në Kuvendin e Shqipërisë, ndërsa nuk i kurseu sulmet ndaj kryeministrit Rama. Ai tha se kryeministri duhet të ishte në seancë.
“Kryetare, lidhur me procedurën që ndodhin këtu di që në Konferencën e Kryetarëve keni vendosur që votimi të jetë elektronik. Votimet e radhës së kaluar ishin të turpshme, me kartona apo letra higjienike. Duhet të anulohet votimet e javës së kaluar. Komisioni vendosi që përjashtonte 5 deputetë, po pse jo të gjithë?
Ne ishim të gjithë atje. Ku është ai palaço sot? Të vijë të na japë llogari për ato lekët që ka dhënë, ai meriton që të quhet palaço cirku”, tha ai.
Kryeparlamentarja Lindita Nikolla iu përgjigj duke thënë se në Kuvend është votuar sipas rregullores.
“Thatë një të pavërtetë, është votuar gjithmonë sipas rregullores. Kështu është e vërteta dhe kështu ka ndodhur”, tha Nikolla.
