Teksa po vijon procesi i votimit në të gjithë vendin për kreun e Partisë Demokratike, pas ish-kryeministrit Berisha ka votuar Ibsen Elezi kandidati tjetër në garën për kreun e PD.
Në një deklaratë për mediat, Elezi kërkoi që të zhvillohet një proces i rregullt dhe transparent. Ai tha se do ta njohë rezultatin por nuk do të tolerojë asnjë shkelje.
“Të numërohet çdo votë dhe të mos shtohet asnjë votë për asnjë kandidat. Ka zëra që qarkullojnë sepse në të kaluarën ka pasur shkelje nga më të rëndat. Në të kaluarën ka ndodhur rëndom kjo punë. Edhe po të kem informacion nuk mund ta mbështes në asnjë fakt. Kam vëzhgues në qendra.
Kam mbajtur një qëndrim tolerues në momentin kur ata nuk e kanë pasur vullnetin për t’u deklaruar në proces. Drita e së ardhmes nuk është as doktori dhe as unë. Drita e së ardhmes është vota e lirë. Individët nuk janë drita e diellit. Jemi në sistem parlamentar.
Njerëzit duhet të vendosin për ide dhe jo për individë. Jam fokusuar shumë te procesi dhe kjo ka qenë arsyeja pse kam pranuar të jem në garë. Besoj se pas shpalljes së përfundimit do ta njoh rezultatin por kurrsesi nuk do të toleroj… Kam toleruar një pafundësi shkeljesh të vogla dhe parimore që këta po bëjnë. Deri më sot e kam mbyll. Këtë të sotmen nëse verifikohet që komisionerët nuk do jenë korrekt nuk mund ta toleroj jo se s’dua unë ta toleroj, por sepse është e patolerueshme”-tha Elezi.
