Agron Shehaj, kandidat për kryetar të PD-së ka votuar për kreun e ri të Partisë Demokratike.
Në një prononcim për mediat pas votimit, Shehaj falënderoi mbështetësit dhe votuesit e tij ndërsa u bëri thirrje demokratëve që të votojnë me qetësi.
Po ashtu, kandidati për kreun e PD theksoi se sot anëtarët e PD nuk zgjedhin thjesht kryetarin e ri të partisë por vendosin fatin e zgjedhjeve të ardhshme dhe për këtë arsye sipas tij është i rëndësishëm standardi i zgjedhjeve brenda selisë blu.
“Falenderoj mbështetësit dhe vëzhguesit e mi në të gjithë Shqipërinë. I ftoj demokratët që të votojnë me qetësi. Nuk zgjedhin vetëm kryetarin e ri të PD, por vendosin fatin e zgjedhjeve të ardhshme. Standardi i ulët në këtë proces mund të kthehet në një bumerang për PD…Është akoma më e rëndësishme besueshmëria e PD.”
Më herët Shehaj, përmes një postimi në “Facebook”, denoncoi parregullsitë në zgjedhjet që po zhvillohet për kreun e selisë blu.
Shehaj tha se në degët 5, 10 dhe 15 në Tiranë vëzhguesit e tij janë përjashtuar ose nuk janë lejuar të hyjnë në ambientet e votimit. Sipas tij, procesi i votimit në këto degë po komprometohet rëndë, sepse po zhvillohet pa praninë e vëzhguesve dhe po administrohet nga përfaqësuesit e vetëm një kandidati./Opinion.al
