Gramoz Ruçi vendosi sot të mos e anulojë votimin e së enjtes së kaluar për shembjen e teatrit kombëtar. Kjo pasi i ka mbërritur vendimi i Sekretariatit se “votimi është i vlefshëm”. Kujtojmë se partitë opozitare, PD dhe LSI kërkuan të anulohej ky votim pasi rezulton i manipuluar. Sipas tyre, Robert Bitri (i pavarur) ka votuar në vend të deputetit të LSI, Vangjel Tavo. Por sipas mazhorancës, ka qenë pikërisht LSI ajo që ka manipuluar pasi i ka ndërruar kartën në tavolinë, z. Bitri.
Pas vendimit, për të mos e anuluar votimin për teatrin, ka reaguar kreu i grupit të PD, Edmond Spaho. Përmes një postimi në facebook, ai shkruan:
“Sekretariati për Procedurat dhe Votimet mori vendimin qe pritej, mbeshteti maxhorancen qe votimi i ligjit per shembjen e Teatrit Kombetar paska qene i rregullt. Kjo ne kushtet kur prova eshte e pakontestueshme qe deputeti i maxhorances Bitri votoi ne emer te deputetit Tavo. Me mekanizmin e votes vendosen sipas interesave te tyre ne mbrojtje te aferes korruptive te Rames dhe sulmit te eger te tij ndaj trashegimise kulturore dhe historike te Tiranes. Sa here e kane ndjere te nevojshme kane perdorur mekanizmin e votes ne Sekretariat, ne Byro apo per ti hequr te drejten e fjales opozites ne seance plenare. O Gramos o Gramos vete shkruan vete vulos. Si ne diktature”.
