Kryesia e Kuvendi të Kosovës, ka vendosur që me datë 3 shkurt në ora 11:00 të mbahet seanca plenare për votimin e qeverisë së re të Kosovës. Vendimi i Kryesisë së Kuvendit, vjen pas kërkesës së bërë nga lideri i Lëvizjes “Vetëvendosje”, Albin Kurti.
Ndërkohë, Kurti ende nuk ka arritur ta finalizojë marrëveshjen për koalicion me Lidhjen Demokratike të Kosovës, gjë që e bën të paqartë sigurimin e shumicës prej 61 votave në Kuvend për formimin e qeverisë së re.
Kryetari i Kuvendit të Kosovës, Glauk Konjufca, gjatë një paraqitjeje për gazetarë pas mbledhjes së Kryesisë, u shpreh optimist për arritjen e një marrëveshjeje midis LDK-së dhe VV-së para datës 3 shkurt.
“Bisedimet po vazhdojnë, nuk ka ende një marrëveshje përfundimtare. Unë jam shumë optimist që marrëveshja do të bëhet dhe që askush nuk do të mund ta ndalë formimin e qeverisë Kurti”, tha Konjufca./ Opinion.al
