Ministri Arbjan Mazniku ka folur mbi çështjen e votimit të emigrantëve, teksa ka qenë i ftuar mbrëmjen e sotme në emisionin Opinion në Tv Klan.
Ai tha se kjo çështje ka vite që është shtruar për diskutim nga Partia Socialiste, por nuk është avancuar për shkak të asaj që ai e quan “partizanizmit”, duke ju referuar partive opozitare.
Ndër të tjera, Mazniku theksoi se vënia në zbatim e votimit të emigrantëve nuk është bllokuar nga PS.
“Partia Socialiste si forcë politike ka qenë forca që ka propozuar në mënyrë eksplicite vendosjen e parashikimeve në Kodin Elektoral për ta mundësuar, por siç ka ndodhur në mënyrë sistematike ka pasur nevojë që të jenë biopartizane dhe problemi i aplikimit praktik ka qenë problemi që janë bllokuar nga ana e partizanizmit por jo nga PS”.
Megjithatë, Mazniku theksoi se votimi i emigrantëve mund të bëhet, por duhen diskutuar elementë teknikë dhe ligjorë në Komisionin e Reformës Zgjedhore.
“Vota e emigrantëve është pjesë e tryezës së famshme të Komisionit për Reformën. Ka elementë ligjorë. Do kemi të bëjmë me një zonë të posaçme elektorale, e cila është e padefinuar. Çështje thelbi është ka nevojë për një seri zgjidhjesh teknike dhe ligjore. Nuk ka asnjë çështje për të cilën nuk ka zgjidhje”, u shpreh Mazniku.
