Presidenti Ilir Meta ka reaguar me ironi për votimet e 30 qershorit. Në një postim në rrjetet sociale, që e shoqëron dhe me një video nga votimet familjare në Finiq, kreu i shtetit së pari thekson se qytetarët qëndruan larg konfrontimit dhe dhunës duke respektuar në mënyrë qytetare njëri-tjetrin.
Edhe në këtë reagim ai e cilëson 30 qershorin si votime socialiste të thirrura nga kryeministri Rama.
Por Meta shkon edhe më tej teksa me tallje thotë se tani i duhet të “shpik” një dekoratë të re.
“Besoj me ndihmën e Kuvendit socialist do miratohet, kjo dekoratë e “Heroit të votave socialiste”, thekson Meta.
Postimi i plotë
Urime të gjithë qytetarëve që dje iu larguan konfrontimit dhe dhunës duke respektuar në mënyrë qytetare njëri-tjetrin, pavarësisht nga qëndrimi ndaj votimeve socialiste të thirrura nga kryeministri Rama. Shqipëria shpëtoi nga kurthi i përplasjes civile, ndaj i falënderoj nga zemra të gjithë shqiptarët që nuk ranë viktimë e retorikës konfrontuese të liderëve të papërgjegjshëm, që përmes nxitjes së dhunës duan të fshehin skandalet dhe llogaridhënien e tyre.
Përsa i takon tejkalimeve të planit në votimet socialiste, asnjë surprizë nuk kisha.
Tani me duhet të “shpik” një dekoratë të re, që besoj me ndihmën e Kuvendit socialist do miratohet, atë të “Heroit të votave socialiste”. Për të shijuar rikthimin e kohës së votimeve kolektive, ju ftoj të ndiqni edhe këtë video/ Opinion.al
https://www.facebook.com/ilirmetazyrtar/videos/2388326878063638/
