Pasi ka përfunduar procesi i numërimit të votave preferenciale në Fier, drejtuesja politike e Partisë Socialiste për këtë qark, Belinda Balluku ka folur për mediat.
Balluku thekson se për të si drejtuese është kënaqësi që shqiptarët nuk kanë votuar vetëm për subjektin politik, por janë pëlqyer edhe kandidatët që PS ka futur në listë.
Kujtojmë se më i votuari nga lista ishte Ceno Klosi me mbi 16 mijë vota.
“Ka qenë në proces të numërimit të votave individuale që ka mbaruar me sukses, pa asnjë konflikt. Dua të falënderoj të gjithë komisionerët dhe padyshim edhe anëtarët e KZAZ 60 që e kanë pasur punën pak më të vështirë për shkak të shumë kutive që ka duke qenë se përfaqëson qytetin e Fierit.
Votat individuale në një bashki me kaq votues është normale që të ketë edhe vota individuale që po konkurrojnë në rang vendi, pasi kam parë që ata që kanë dalë këtu janë rreshtuar në rang vendi.
Ceno Klosi është i pari me mbi 16 mijë vota, Klevis Jahaj i dyti me rreth 13 mijë vota. Për mua është kënaqësi sepse shikoj që nuk është mbështetur vetëm subjekti, por edhe zgjedhjet që ne kemi bërë për deputetë. Duhet thënë që kësaj rradhe ne kishim një listë që gjithkush ishte i përfaqësuar”, tha Balluku.
