“KQZ të mos miratojë asnjë rezultat, por të kryejë një auditim të plotë të këtij procesi, me ekspertë të pavarur.” Ky ka qenë denoncimi që ka bërë Partia Demokratike për votat e diasporës.
Sekretari për Çështjet Ligjore dhe Zgjedhore në PD, Ivi Kaso e cilësoi procesin si “masakër elektorale” dhe theksoi se ai është kompromentuar rëndë, veçanërisht në Greqi.
Në deklaratën e tij për mediat, Kaso përmendi një sërë shqetësimesh lidhur me procesin zgjedhor, përfshirë rastet e denoncuara nga shqiptarët, si zarfe bosh pa fletë votimi, shpërndarjen e zarfeve nga patronazhistë dhe gabime të tjera administrative, si dhe votat e ardhura në qarkun Durrës që përmbanin vota për Gjirokastrën.
Kaso theksoi se procesi është i papërgjegjshëm dhe po reflekton gjithashtu atë që ka ndodhur brenda vendit.
PD kërkoi që KQZ të kryejë një auditim të plotë të procesit zgjedhor, përfshirë regjistrimin e zgjedhësve, prodhimin e fletëve të votimit dhe administrimin e tyre, me ekspertë të pavarur që të analizojnë çdo hap dhe të japin një pasqyrë të plotë të procesit. Gjithashtu kërkoi që KQZ të mos shpallë asnjë rezultat për votat e diasporës derisa të dalin rezultatet nga auditi i pavarur.
Kaso theksoi se procesi i votimit ka dështuar dhe është korruptuar, duke humbur besueshmërinë e tij, dhe përfundoi duke akuzuar mazhorancën se ka ndikuar në dezintegrimin e procesit, i cili fillimisht kishte për qëllim t’u jepte të drejtën e votës shqiptarëve jashtë vendit.
Deklarata e sekretarit për Çështjet Ligjore dhe Zgjedhore në PD, Ivi Kaso:
Teksa po numërohen votat e fundit të diasporës, procesi jo vetëm që po bëhet gjithnjë e më shumë qesharak, por qartazi u ka dalë nga duart atyre që projektuan këtë masakër elektorale.
Dështimi katastrofik i këtij procesi ngado, po veçanërisht në Greqi, shpaloset përditë, me prova, para syve të qytetarëve.
– Pas rasteve të panumërta të denoncuara nga bashkëatdhetarët tanë, të zarfeve të mbërritur bosh pa fletë votimi, të zarfeve të shpërndarë nga patronazhistë, paradoksalisht këtej numërohen shumë më shume fletë votimi se sa zarfe të ardhura;
– Pas zarfeve të mbërritur për në qarkun Durrës që përmbanin vota për Gjirokastrën,
– Pasi KQZ ende sot nuk di të na thotë së sa fletë votimi ka vulosur për diasporën, … e sa e sa raste çudirash të tilla,
Ky proces është tashmë i kompromentuar rëndë dhe jo legjitim.
Për më tepër ai reflekton edhe atë që ka ndodhur Brenda vendit, nëpërmjet të njëjtit mekanizëm!
Ne sot i kërkojmë zyrtarisht Komisionit Qendror të Zgjedhjeve, kryerjen e një auditi të plotë, me ekspertë të pavarur, për të gjitha hapat e këtij procesi të korruptuar në palcë, duke filluar nga regjistrimi i zgjedhësve, nga prodhimi i fletës së votimit nga jashtë e të çdo hapi tjetër deri në administrimin e fletës së mbërritur dhe në daljen e rezultatit për çdo qark.
Gjithashtu i kërkojmë KQZ, mosnxjerrjen e asnjë rezultati dhe mosmiratimin përfundimtar të asnjë tabele për diasporën derisa auditi i pavarur të dorëzojë konkluzionet e tij mbi procesin dhe të bëjë transparencë të plotë mbi votën e shqiptarëve.
Ky proces tashmë ka rënë totalisht.
Ne nuk mund të shpëtojmë, për fat të keq, fytyrën e këtij procesi i cili, me këmbënguljen e Partisë Demokratike synonte t`u jepte të drejtën e munguar shqiptarëve jashtë Shqipërisë, por që u korruptua në palcë dhe u disintegruar përpara syve të gjithë shqiptarëve, në saj të vullnetit të mbrapshtë të kësaj mazhorance!
